გიორგი ალექსიძის სახელობის თანამედროვე ქორეოგრაფიის განვითარების ფონდის მიერ საქართველოს განათლების, მეცნიერების, კულტურისა და სპორტის სამინისტროს ხელშეწყობით, გამომცემლობა „სეზანში“  დაიბეჭდა გიორგი ალექსიძის ავტობიოგრაფიული წიგნი „ბალეტი ცვალებად სამყაროში“.

წიგნი მოიცავს გიორგი ალექსიძის მოგონებებს, მის დამოკიდებულებას კოლეგებისა და ქორეოგრაფიის ხელოვნებისადმი. განსაკუთრებით შთამბეჭდავია მსჯელობა პროფესიაზე და სხვადასხვა ქორეოგრაფიული მიმდინარეობების ანალიზი. გიორგი ალექსიძის წიგნი „ბალეტი ცვალებად სამყაროში“ ქართული კულტურისა და ქორეოგრაფიის უმნიშვნელოვანესი მონაპოვარია, უაღრესად საინტერესო და შემეცნებითია დარგის სპეციალისტებისთვის, მომავალი თაობისთვის, განსაკუთრებულად კი მომავალი ქორეოგრაფებისათვის.

წიგნზე მუშაობა თავდაპირველად ხელოვნებათმცოდნე სოფო კილასონიამ დაიწყო,შემდეგ მარინა ალექსიძემ  სხვადასხვა საინტერესო ტექსტი გააერთიანა, გიორგი ალექსიძის კოლეგების სტატიები დაამატა, რამაც მასალა უფრო მეტად გაამდიდრა და გაამთლიანა. ალექსიძეების ოჯახის არქივიდან წიგნი მდიდარ, ისტორიულ ფოტომასალასაც მოიცავს. დიზაინი თანამედროვე და ორიგინალურია. აღსანიშნავია, რომ მარინა ალექსიძის ჩანაფიქრით, დიზაინერმა ბესიკ დანელიამ გასაფორმებლად გიორგი ალექსიძის ქორეოგრაფიული ფანტაზიების მხატვრული ჩანახატები გამოიყენა, რაც ტექსტისგან დამოუკიდებლადაც უაღრესად საინტერესოა. წიგნი გამორჩეულია ვიზუალურ-მხატვრული გადაწყვეტითა და მაღალპოლიგრაფიული ხარისხით. გამომცემლობა „სეზანი“ წიგნს 2018 წლის ფრანკფურტის წიგნის ბაზრობაზე წარადგენს.