ნატალია კუკულაძე

2009 წელს დაამთავრა თბილისის ვ. ჭაბუკიანის სახელობის ქორეოგრაფიული სასწავლებელი; მუშაობდა ბალეტის პედაგოგ-რეპეტიტორად. 2014 წლიდან, როგორც ბალეტის მოცეკვავემ, სტაჟირება გაიარა თბილისის ზ. ფალიაშვილის სახელობის ოპერისა და ბალეტის სახელმწიფო აკადემიურ თეატრში.

2016 წლიდან ნატალია კუკულაძე გიორგი ალექსიძის სახელობის „თბილისის თანამედროვე ბალეტის“ ბალეტის მსახიობია. მონაწილეობს დასის სარეპერტუარო დადგმებსა თუ პროექტებში:

გიორგი ალექსიძის ქორეოგრაფია: საბალეტო მინიატურები - გია ყანჩელი „შუშანიკის წამება“, ი. ს. ბახი Agnus Dei , ისააკ დუნაევსკი „ჩაპლინი“, დმიტრი შოსტაკოვიჩი „შიში“, ანტონიო ვივალდი La Notte, თანამედროვე ბალეტები გია ყანჩელის მუსიკაზე „ფსალმუნი“ და „დიპლიპიტო”, მხატვარი – იური გეგეშიძე; ჯამბაზი თანამედროვე ბალეტში Connexion ალფრედ შნიტკეს მუსიკაზე; აქტრისა მარგარიტას სახე თანამედროვე ბალეტში „ფიროსმანი“ სულხან ნასიძის მუსიკაზე; წითელი ქალის სახე თანამედროვე ბალეტში „ლირიკული სიუიტა“ ალბან ბერგის მუსიკაზე.

მარიამ ალექსიძის ქორეოგრაფია: ქორო და ფირუზისფერი მნათობის სახე თანამედროვე ბალეტში ნიზამი განჯელის პოემების მიხედვით „ხამსე“ ფოლად ბულბულ ოღლის მუსიკა, მხატვარი – მურაზ მურვანიძე; ექოს და არიადნას სახე თანამედროვე ბალეტში ოვიდიუსის მეტამორფოზების მიხედვით „მეტამორფოზები“, ი.ს. ბახისა და ნიკა მაჩაიძის ორიგინალური მუსიკა, მხატვარი – ანა ნინუა; ფრანჩესკას სახე თანამედროვე ბალეტში „ბეატრიჩე“, იდეისა და კონცეფციის ავტორი დავით მაზიაშვილი, ოსკარის, ოქროს გლობუსისა და მრავალი ჯილდოს მფლობელმი თანამედროვე იტალიელი კომპოზიტორის დარიო მარიანელის მიერ ბალეტისათვის სპეციალურად შექმნილი საავტორო მუსიკა, რომელიც თბილისის სახელმწიფო კამერულ ორკესტრ „საქართველოს სინფონიეტას“ მიერ სცენაზე ცოცხლად სრულდება. კოსტიუმების დიზაინერი -  თამუნა ინგოროყვა. მონაწილეობს სპექტაკლებში: თანამედროვე ბალეტი გალაკტიონ ტაბიძის პოეზიაზე „დოვინ-დოვენ-დოვლი...“, STALAG VIII-A, PENSATIVA, …à la Duduki, „გურჯი-ხათუნი“, „ფოლია“, „მეტრონომი“, „ხმა დაირისა..“, The Goldberg Variations, „ძველებური ცეკვები“, „12 პაემანი“, The Bach Project 1 და სხვა

ნატალია კუკულაძე მონაწილეობს დასის საგასტროლო წარმოდგენებში საქართველოს რეგიონებში. 2019 წელს დასთან ერთად მონაწილეობა მიიღო საგასტროლო წარმოდგენაში შვეიცარიის ქ.ციურიხში, სადაც Theater Rigiblick-ში ნაჩვენები იყო მარიამ ალექსიძის თანამედროვე ბალეტი  STALAG VIII-A, ოლივიე მესიანის თხზულებაზე „კვარტეტი ჟამთა აღსასრულისა“, შვეიცარიაში მოღვაწე მუსიკოსების ირინა ვარდელის, მატია ზაპას, ანდრეას იანკესა და დიმიტრი აშკენაზის მონაწილეობით. 

2019 წელს დასი შეუერთდა თანამედროვე ცეკვის ნოვატორ ამერიკელ ქორეოგრაფ მერს კანინგემის 100 წლის საიუბილეო თარიღის მსოფლიო აღნიშვნას. ნატალიამ მონაწილეობა მიიღო კანინგემის ცეკვის ტექნიკის კლასებსა და რეპერტუარის ვორკშოპში, რომელიც მოწვეულმა პედაგოგმა ეშლი ჩენმა დასის მოცეკვავეებსა და სტუდენტებს ჩაუტარა. 2020 წელს კი ნატალიამ მონაწილეობა მიიღო ერთ-ერთი ყველაზე გამორჩეული ბრიტანელი ქორეოგრაფის უეინ მაკგრეგორის რეპერტუარის ვორკშოპში, რომელიც დასისთვის ჩატარდა უეინ მაკგრეგორის დასის მოცეკვავისა და მიწვეული პედაგოგის ლუის მაკმილერის მიერ.

2020-ში ნატალია გადაღებული იყო მუსიკოს Nash Albert-ის სიმღერის, Autumn Rain ვიდეოკლიპში, რომლისთვისაც ცეკვა სპეციალურად მარიამ ალექსიძემ დადგა და გადაღება რუსთაველის ეროვნული თეატრის დიდ სცენაზე შედგა.

2021-2022 წლებში ნატალია კუკულაძემ დასთან ერთად მონაწილეობა მიიღო საქართველოს დამოუკიდებლობის დღისადმი მიძღვნილ გალა-კონცერტებში, ხოლო 2023 წელს საქართველოს პატრიარქისადმი მიძღვნილ საიუბილეო კონცერტში, რომელიც თბილისის ზაქარია ფალიაშვილის სახელობის ოპერისა და ბალეტის სახელმწიფო თეატრში გაიმართა.

2023 წლიდან ნატალია კუკულაძე გიორგი ალექსიძის სახელობის „თბილისის თანამედროვე ბალეტის“ სოლისტია.