თინათინ ბარამიძე

თინათინ ბარამიძე მცირე ასაკიდან კლასიკურ და თანამედროვე ბალეტს მაკა მახარაძის ბავშვთა საბალეტო სკოლაში ეუფლებოდა. მონაწილეობდა სტუდიის ყველა საბავშვო სპექტაკლში რუსთაველის, მარჯანიშვილისა და სამეფო უბნის თეატრების სცენებზე. მონაწილეობდა მაკა მახარაძის სტუდიისთვის დადგმულ მარიამ ალექსიძის საავტორო სპექტაკლებში: „ჩვენ ვცეკვავთ გერშვინს“, „სათამაშოების მეჯლისი“, „სტუმრად ამადეუსთან“ და „მაკნატუნა“. რუსთაველის თეატრში, როგორც მოცეკვავე, მონაწილეობდა რობერტ სტურუასა და ნიკოლოზ ჰაინე-შველიძის სპექტაკლ „საახალწლო მეჯლისში“. ბავშვთა საბალეტო სტუდიებისა და სასწავლებლების ფესტივალზე მიიღო პრიზი მარიამ ალექსიძის მიერ დადგმული მინიატიურის, „პრინცესა გველის“ საუკეთესო შესრულებისთვის.

2016 წლიდან თინათინ ბარამიძე გიორგი ალექსიძის სახელობის „თბილისის თანამედროვე ბალეტის“ პრაქტიკანტი იყო, სადაც გაიარა თანამედროვე ცეკვის ტექნიკის კურსი, დაეუფლა კლასიკური ბალეტის ტექნიკას და გაიარა სასცენო პრაქტიკა  დასის სარეპერტუარო დადგმებსა თუ პროექტებში.

2018 წ-ს თინათინი შეუერთდა დასს პირველ საერთაშორისო გასტროლზე გერმანიაში; ლიტერატურულ-მუსიკალურ-ქორეოგრაფიული პროექტი Hinter den Grenzen განხორციელდა მარიამ ალექსიძის მიერ გერმანიაში მოღვაწე მუსიკოსისა და კომპოზიტორის რუსუდან მეიფარიანის ანსამბლთან თანამშრომლობით.

2019 წელს დასი შეუერთდა თანამედროვე ცეკვის ნოვატორ ამერიკელ ქორეოგრაფ მერს კანინგემის 100 წლის საიუბილეო თარიღის მსოფლიო აღნიშვნას. თინათინმა მონაწილეობა მიიღო კანინგემის ცეკვის ტექნიკის კლასებსა და რეპერტუარის ვორკშოპში, რომელიც მოწვეულმა პედაგოგმა ეშლი ჩენმა დასის მოცეკვავეებსა და სტუდენტებს ჩაუტარა. 2020 წელს კი თინათინმა მონაწილეობა მიიღო ერთ-ერთი ყველაზე გამორჩეული ბრიტანელი ქორეოგრაფის უეინ მაკგრეგორის რეპერტუარის ვორკშოპში, რომელიც დასისთვის ჩატარდა უეინ მაკგრეგორის დასის მოცეკვავისა და მიწვეული პედაგოგის ლუის მაკმილერის მიერ.

2020-ში თინათინი დასის მოცეკვავეებთან ერთად გადაღებული იყო მუსიკოს Nash Albert-ის სიმღერის, Autumn Rain ვიდეოკლიპში, რომლისთვისაც ცეკვა სპეციალურად მარიამ ალექსიძემ დადგა და გადაღება რუსთაველის ეროვნული თეატრის დიდ სცენაზე შედგა.

2021 წლიდან თინათინი შოთა რუსთაველის თეატრისა და კინოს სახელმწიფო უნივერსიტეტის სტუდენტია.

2021 წლიდან თინათინ ბარამიძე გიორგი ალექსიძის სახელობის „თბილისის თანამედროვე ბალეტის“ მსახიობია და მონაწილეობს დასის სარეპერტუარო დადგმებსა თუ პროექტებში:

გიორგი ალექსიძის ქორეოგრაფია:  საბალეტო მინიატურები - ჩარლი ჩაპლინი Smile, ხოსე მერსე „ფლამენკო“, ი. ს. ბახი Agnus Dei;  ანტონიო ვივალდი La Notte;  თანამედროვე ბალეტები გია ყანჩელის მუსიკაზე „დიპლიპიტო” და „ფსალმუნი“; თანამედროვე ბალეტები Connexion ალფრედ შნიტკეს მუსიკაზე, „ფიროსმანი“ სულხან ნასიძის მუსიკაზე და „ლირიკული სიუტა“ ალბან ბერგის მუსიკაზე.

მარიამ ალექსიძის ქორეოგრაფია: ანგელოზის სახე თანამედროვე ბალეტში ნიზამი განჯელის პოემების მიხედვით „ხამსე“ ფოლად ბულბულ ოღლის მუსიკა, მხატვარი – მურაზ მურვანიძე; ანგელოზისა და თისბეს სახე თანამედროვე ბალეტში ოვიდიუსის მეტამორფოზების მიხედვით „მეტამორფოზები“, ი.ს. ბახისა და ნიკა მაჩაიძის ორიგინალური მუსიკა, მხატვარი – ანა ნინუა; დანტეს „ღვთაებრივი კომედიის“ მიხედვით  თანამედროვე ბალეტი-ხილვა „ბეატრიჩე“, დავით მაზიაშვილის იდეა და კონცეფცია, ოსკარის, ოქროს გლობუსისა და მრავალი ჯილდოს მფლობელი თანამედროვე იტალიელი კომპოზიტორის, დარიო მარიანელის მიერ ბალეტისათვის სპეციალურად შექმნილი საავტორო მუსიკა, რომელიც თბილისის სახელმწიფო კამერულ ორკესტრ „საქართველოს სინფონიეტას“ მიერ სცენაზე ცოცხლად სრულდება. კოსტიუმების დიზაინერი - თამუნა ინგოროყვა. მონაწილეობს სპექტაკლებში: თანამედროვე ბალეტი გალაკტიონ ტაბიძის პოეზიაზე „დოვინ-დოვენ-დოვლი...“, „ფოლია“, „მეტრონომი“, „ხმა დაირისა..“, „12 პაემანი“, The Bach Project 1 და სხვა

თინათინ ბარამიძე დაესწრო პროფესორ დავით მაზიაშვილის მიერ გიორგი ალექსიძის სახელობის „თბილისის თანამედროვე ბალეტის“ დასში განხორციელებულ საგანმანათლებლო პროექტებს - დავით მაზიაშვილის სალექციო ციკლი: თანამედროვე ბალეტი „ბეატრიჩე“ - სამი საუბარი დანტესა და „ღვთაებრივ კომედიაზე“; დავით მაზიაშვილის შემეცნებითი შეხვედრები და ლექციები პროექტ „მეტამორფოზების“ ფარგლებში  და სხვა.

2021-2022 წლებში თინათინმა დასთან ერთად მონაწილეობა მიიღო საქართველოს დამოუკიდებლობის დღისადმი მიძღვნილ გალა-კონცერტებში, ხოლო 2023 წელს საქართველოს პატრიარქისადმი მიძღვნილ საიუბილეო კონცერტში, რომელიც თბილისის ზაქარია ფალიაშვილის სახელობის ოპერისა და ბალეტის სახელმწიფო თეატრში გაიმართა.